Back to top

Zer da Mugarik Gabeko Medikuak?

Mugarik Gabeko Medikuak ekintza humanitarioak egiten dituen nazioarteko elkarte mediko bat da, jatorri naturaleko eta giza jatorriko hondamendien eta gatazka armatuen biktimei laguntza eskaintzen diena, arraza, erlijio edo ideologia politikoagatik inolako bereizketarik egin gabe. Krisi-egoeretan gure presentzia independentea eta inpartziala denez gero, berehalako laguntza eskain diezaiekegu premia handienak dituzten pertsonei. Mediku-ekintza lehenesten dugu, baina lekukotza erabiltzen dugu gure laguntza jasotzen duten populazioen alde aldaketak eragiteko baliabide gisa.

MediterraneoaAnna Surinyach/MSF

Abian gara 1971z geroztik 

Hirurogeita hamarreko hamarraldiaren hasieran, bi mediku-talde elkarrekin egokitu ziren Frantzian. Batzuk Biafrako gerran (Nigeria, 1968) iboen aurkako genozidioaren lekuko izan ziren, baina beren erakundearen aginduek hori salatzea eragotzi zieten. Besteek ikusi zuten 1970. urtean Ekialdeko Pakistanen (egungo Bangladeshen) izandako uholdeetako biktimei eskainitako laguntza ez zela inondik ere eraginkorra. Mediku horien eta beren salaketak jaso zituzten kazetarien inkonformismo horretatik sortu zen Mugarik Gabeko Medikuak. 

Zuzeneko laguntza ahaztuenei 

MSF gaur egun munduan dauden erakunde humanitario independente nagusienetako bat da. 70 herrialde ingurutan lan egiten dugu, gerrek, indarkeriak, bizileku-aldaketek, gaixotasun endemikoek, epidemikoek edo ahaztuek, hondamendi naturalek edo arreta medikotk guztiz baztertu diren pertsonei laguntza emanez. 

Testigantza 

Laguntza zuzena eskaintzeak giza sufrimenduaren lekuko bihurtzen gaitu. Uste dugu ikusten duguna kontatzeak ere biziak salbatzen dituela. Horregatik, sarritan, ozen mintzatu izan gara erantzukizunak adierazteko eta gure laguntza jasotzen duten pertsonen alde aldaketak eragiteko.

Gizaldeko ekintza independenteak 

Gure laguntza benetako premiei zuzendua dago, eta ez interes politiko, ekonomiko edo erlijiosoei. Geuk erabakitzen dugu non eta nola esku hartuko dugun. Ekintza-askatasun hori gure finantza-independentzian oinarritzen da: gure funtsen % 90 pribatuak dira.

Laguntza bere xedera iristen da 

Larrialdietan gehienez 72 ordutan erantzuteko gai baldin bagara, eta horrez gain, ohiko ehunka proiekturi bere horretan eusteko gauza bagara, gure logistika profesionalizatu izanari esker da. Europan erosketa-guneak eta biltegi-guneak ditugu, eta larrialdietarako erreserbak ere baditugu munduko beste eskualde batzuetan. Horri esker, laguntza-katea kontrolatzen dugu jatorritik hasi eta helmugaraino.

Profesional konprometituak 

Medikuak, erizainak, logistak, psikologoak, osasunlangileak, finantzariak, administratzaileak, laborategiko teknikariak, kazetariak.... Beste pertsona batzuei laguntzen dieten pertsonak gara: guztira, 2.700 nazioarteko langile baino gehiago, gutxi gorabehera, lurralde horietara joanak, eta 31.000 profesional tokian bertan kontratatuak.*

* Iturria: Nazioarteko MSF  2014 Memoria

Mugarik gabe 

Mugarik Gabeko Medikuak nazioarteko erakunde bat da; 19 sail ditu, eta horietatik bostek lurraldean bertan kudeatzen dituzte proiektuak zuzenean: Belgikan, Espainian, Frantzian, Herbehereetan eta Suitzan. Gainerakoak Alemania, Australia, Austria, Danimarka, Erresuma Batua, Estatu Batuak, Grezia, Hong Kong, Italia, Japonia, Kanada, Luxenburgo, Norvegia eta Suedia dira eta diru-sarrerak biltzen, giza baliabideak erdiesten edo komunikazioak egiten laguntzen dute. 

Nazioarteko aitorpena 

Egindako lanaren aitorpen modura, MSFk hainbat sari irabazi ditu, hala nola, Asturiasko Printzearen Konkordia Saria (1991), Bakearen Nobel Saria (1999), Osasunaren aldeko Zayed Saria (2002) eta Gizakiaren Aldeko Lidergoarentzako Hussein Erregea Saria (2004). 

Gizartearen laguntza 

MSFk 5,7 milioi bazkide eta laguntzaile ditu mundu osoan, eta horietatik, 425.000 baino gehiago ditu Espainian. Horien ekarpenei eta konpromiso aktiboari esker, berehala eta erabateko independentziaz esku har dezakegu premiarik larrienean dagoenari laguntzeko.

MSF = Ekintza humanitarioa

Ekintza humanitarioa gizarte zibilak gizarte zibilari egiten dion elkartasunezko keinua da, eta horren helburu bakarra bizitza babestea eta sufrimendua arintzea da.

Gure xedea ez da gizartea aldatzea, baizik eta osasuna eta bizitza bera mehatxatuta dauden epealdi larri bat gainditzen laguntzea. Horrexegatik, MSFren esku-hartzeak denboran mugatuak dira.

Urtero, gure taldeek milioika medikuntza-kontsulta, ospitaleratze, ebakuntza eta txertaketa egiten dituzte; arreta eskaintzen diete zaurituei, emakume haurdunei eta desnutrizioa duten haurrei; sendatu egiten dituzte malaria edo GIB/hies duten gaixoak; agerraldi epidemikoen aurka egiten dute; edo behar-beharrezko ondasunak eta edateko ura banatzen dute.

 

Gure konpromiso humanitarioa irabazi-asmorik gabea eta borondatetsua da, eta ondorengo printzipioetan oinarritua dago:

Gizatasuna.

Uste dugu behar duen pertsona orori lagundu behar diogula.

Inpartzialtasuna.

Artatutako pertsonari ez diogu galderarik egiten arrazari, erlijioari edo ideologiari buruz.

Independentzia.

Botere politiko, ekonomiko edo erlijioso batek ere ez digu egin beharrekoa agintzen.

Neutraltasuna.

Ez dugu inoren alde egiten, arreta
behar duten pertsonen alde besterik ez.

Noiz hartzen dugun esku

Krisiaren eraginez populazioaren giza baldintzak eta baldintza medikoak bat-batean hondatzen direnean –beren bizi-iraupena edo osasuna arriskuan jarriz– esku hartzen du MSF erakundeak, eta arreta berezia eskaintzen die inolako laguntzarik jasotzen ez dutenei: 

Siria © Anna Surinyach/MSF
SiriaAnna Surinyach/MSF

Gatazka armatuen biktimak

Zuzenean indarkeriaren mehatxupean bizi diren edo horren ondorioz bizilekua behartuta nahiz beren borondatez aldatu behar izan duten populazioei zuzendutako ekintzak dira.

Sierra Leona © Sylvain Cherkaoui/Cosmos
Sierra LeonaSylvain Cherkaoui/Cosmos

Gaixotasun endemiko eta epidemikoen biktimak

Heriotza-tasa murrizteko xedea duten ekintzak dira, kasu hauetan: GIB/hies, malaria, tuberkulosia, Chagas gaixotasuna, kala azar, loeria, kolera, txarranpina, meningitisa, Ebola eta antzeko sukar hemorragikoak, desnutrizioa eta abar.

Mexiko © Anna Surinyach/MSF
MexikoAnna Surinyach/MSF

Gizarte-indarkeriaren biktimak eta osasun-arretatik baztertuak

Politika edo jardunbide batzuek beren bizia arriskuan jarri eta oinarrizko osasun-zerbitzuetatik baztertzen dituzten pertsonei zuzendutako programak dira, hala nola paperik gabeko etorkinei edo gutxiengo etnikoei.

Nepal © Brian Sokol/MSF
NepalBrian Sokol/MSF

Hondamendi naturalen biktimak

Lurrikarek, uholdeek, tsunamiek eta abarrek eragindakoei laguntzeko larrialdiko erantzuna.