Back to top

Que é Médicos sen Fronteiras?

Médicos Sen Fronteiras é unha organización médico-humanitaria internacional que asiste a poboacións en situación precaria e a vítimas de catástrofes de orixe natural ou humana e de conflitos armados, sen ningunha discriminación por raza, relixión ou ideoloxía política. A nosa presenza independente e imparcial nas crises permítenos dar unha asistencia inmediata ás persoas máis necesitadas. A acción médica é a nosa prioridade, pero tamén recorremos ao testemuño como medio para provocar cambios en favor das poboacións ás que asistimos.

MediterráneoAnna Surinyach/MSF

En marcha dende 1971

A principios dos setenta, coinciden en Francia dous grupos de médicos. Uns foran testemuñas do xenocidio dos ibo na guerra de Biafra (Nixeria, 1968), pero o mandato da súa organización impediulles denuncialo. Outros presenciaran a ineficacia da axuda ás vítimas das inundacións de 1970 en Paquistán Oriental (actual Bangladesh). Do inconformismo destes médicos, e dos xornalistas que recolleron as súas denuncias, nace Médicos Sen Fronteiras.

Asistencia directa aos máis esquecidos

MSF é hoxe unha das principais organizacións humanitarias independentes do mundo. Traballamos en preto de 70 países, e asistimos a persoas afectadas pola guerra, a violencia, o desprazamento, as enfermidades endémicas, epidémicas ou esquecidas, os desastres naturais ou a exclusión extrema da atención médica.

Testemuño

Prestar asistencia directa convértenos en testemuñas do sufrimento humano. Cremos que contar o que vemos tamén salva vidas. Por iso, a miúdo alzamos a voz para sinalar responsabilidades e provocar cambios en favor das persoas ás que asistimos.

Acción humanitaria independente

A nosa asistencia responde a necesidades reais e non a intereses políticos, económicos ou relixiosos. Só nós decidimos onde e como intervimos. Esta liberdade de acción baséase na nosa independencia financeira: o 90 % dos nosos fondos son de orixe privada*.

A axuda chega ao seu destino

Se somos capaces de responder ás emerxencias nun máximo de 72 horas, ao tempo que mantemos centos de proxectos regulares, é grazas á profesionalización da nosa loxística. Contamos con centrais de compra e almacenaxe en Europa, e con reservas de emerxencia situadas noutras rexións do mundo. Grazas a iso, controlamos a cadea de axuda dende a súa orixe ata o seu destino.

Profesionais comprometidos

Médicos, enfermeiros, loxistas, psicólogos, axentes de saúde, financeiros, administradores, técnicos de laboratorio, xornalistas... Somos persoas axudando a outras persoas: en total, máis de 2.700 traballadores internacionais desprazados in situ e 31.000 profesionais contratados localmente*.

Sen fronteiras

Médicos Sen Fronteiras é unha organización internacional e conta con 21 seccións, cinco das cales xestionan directamente proxectos in situ: Bélxica, España, Francia, Holanda e Suíza. As demais (Alemaña, Australia, Austria, Brasil, Canadá, Dinamarca, Estados Unidos, Grecia, Hong Kong, Italia, Luxemburgo, Noruega, Reino Unido, Sudáfrica, Suecia e Xapón,) dan respaldo en captación de fondos, recrutamento de recursos humanos ou comunicación.

Recoñecemento internacional

En recoñecemento ao seu labor, MSF foi galardoada, entre outros, co Premio Príncipe de Asturias da Concordia (1991), o Premio Nobel da Paz (1999), o Premio Zayed para a Saúde (2002) e o Premio Rei Hussein ao Liderado Humanitario (2004).

Apoio da sociedade

MSF conta con 5,7 millóns de socios e colaboradores en todo o mundo, dos cales máis de 425.000 están en España. Grazas ás súas achegas e ao seu compromiso activo, podemos intervir de inmediato e con total independencia para asistir a quen máis o necesita.

Etiquetas
#SeguirConVida

MSF = Acción humanitaria

A acción humanitaria é un xesto solidario de sociedade civil a sociedade civil, cuxa única finalidade é preservar a vida e aliviar o sufrimento.

Non aspiramos a transformar unha sociedade, senón a permitirlle superar un período crítico no que a saúde e a vida están ameazadas. Por iso as nosas intervencións son limitadas no tempo.

Cada ano, os nosos equipos realizan millóns de consultas médicas, hospitalizacións, cirurxías e vacinacións; atenden feridos, mulleres embarazadas e nenos con desnutrición; tratan pacientes de malaria ou VIH/sida; responden a brotes epidémicos; ou distribúen bens de primeira necesidade e auga potable.

O noso compromiso humanitario é desinteresado e non lucrativo, e baséase nos seguintes principios:

Humanidade

Cremos que toda persoa que necesita axuda debe ser asistida.

Imparcialidade

Non preguntamos pola raza, a relixión ou a ideoloxía das persoas que atendemos.

Independencia

Ningún poder político, económico ou relixioso dita as nosas accións.

Neutralidade

Non tomamos partido por ninguén, só polas persoas que necesitan asistencia.

Cando intervenimos

MSF intervén ante a deterioración brusca das condicións médico-humanitarias de poboacións afectadas pola crise que ameaza a súa supervivencia ou a súa saúde, con atención especial aos que non reciben asistencia:

Siria © Anna Surinyach/MSF

Vítimas de conflitos armados. Intervencións dirixidas a poboacións cuxa integridade está directamente ameazada pola violencia ou que tiveron que desprazarse (forzosa ou voluntariamente) a consecuencia desta.

Serra Leoa © Sylvain Cherkaoui/Cosmos

Vítimas de enfermidades endémicas e epidémicas. Actividades destinadas a reducir a mortalidade por VIH/sida, malaria, tuberculose, Chagas, kala azar, enfermidade do sono, cólera, sarampelo, meninxite, febres hemorráxicas como o ébola, desnutrición, etc.

México © Anna Surinyach/MSF

Vítimas de violencia social e exclusión da atención sanitaria. Programas orientados a persoas afectadas por políticas ou prácticas que poñen a súa vida en perigo e as exclúen dos servizos de saúde, como emigrantes indocumentados ou minorías étnicas.

Nepal © Brian Sokol/MSF

Vítimas de desastres naturais. Resposta de emerxencia aos afectados por terremotos, inundacións, tsunamis, etc.