Panamá

Panamá rexistrou en 2021 unha cifra sen precedentes de migrantes: preto de 134.000 persoas, en comparación coas 8.600 que había no país o ano anterior. A gran maioría eran haitianos, que anteriormente se asentaran en países como Brasil e Chile, pero que, debido ás políticas antimigratorias neses países e á crise económica causada pola COVID-19, agora desprazábanse cara a México e Estados Unidos coa esperanza de atopar máis seguridade e mellores oportunidades. As outras dúas nacionalidades máis habituais eran a cubana e a venezolana. Moitas persoas incluso viaxaban coas súas familias, ata con nenos pequenos e mulleres embarazadas.

Cruzar o Tapón ata Bajo Chiquito, primeira comunidade do lado panameño da fronteira, pode levar máis de cinco días e é extremadamente perigoso. O terreo é traizoeiro: hai cantís e os ríos sofren crecidas repentinas, de forma que, a miúdo, a xente pérdese e queda sen comida nin auga. Ademais, bandas criminais operan na zona e atacan e rouban aos migrantes.

En abril, MSF comezou a atender a quen conseguía chegar a Bajo Chiquito e en dous centros de recepción na zona, todo iso en colaboración co Ministerio de Saúde. Ademais de atención médica, os nosos equipos brindaron apoio en saúde mental ás numerosas vítimas da violencia e a violencia sexual, así como a persoas que perderan a familiares na selva. Había moitas familias con nenos pequenos, e case a metade das persoas ás que atendemos eran menores de 14 anos. Os nosos equipos tamén realizaron melloras na infraestrutura nos centros de saúde e asesoraron en materia de auga e saneamento.

Durante todo o ano, ademais, defendemos publicamente a necesidade de abrir rutas migratorias seguras e pedimos aos Gobernos da rexión que tomen medidas para protexer da violencia a estas persoas.

Este artigo ofrece unha visión xeral do noso traballo neste país entre xaneiro e decembro de 2021; é un resumo que non pode considerarse exhaustivo. En 2021, contabamos con 7 profesionais* e gastamos 1 millón de euros nas nosas actividades médico-humanitarias. MSF traballou en Panamá por primeira vez en 2008, cando abriu unha oficina rexional de resposta a emerxencias, que estivo activa ata 2013. As primeiras actividades humanitarias no propio Panamá corresponden a 2021.

En 2021, MSF España era a única sección de MSF con actividades no país. Se queres coñecer máis en profundidade o noso traballo alí, consulta o noso 'Informe de Operacións 2021'.

* A cifra de persoal equivale ao total de postos a tempo completo ou FTE (do inglés full-time equivalent). Por exemplo, dúas persoas a media xornada equivalen a un FTE.