Traballa en MSF: preguntas máis frecuentes

A maior parte das vacantes nos nosos proxectos son de máis de seis meses de duración: por iso requirimos unha dispoñibilidade mínima de 12 meses para poder iniciar o proceso de selección. Só se aceptan estancias curtas no caso de perfís concretos (especialidades de cirurxía, xinecoloxía e anestesia).

Un dos requisitos imprescindibles para traballar con MSF é ter rematado a formación de acordo ó perfil solicitado. Ademais, débese contar con polo menos dous anos de experiencia laboral no ámbito no que se queira traballar. MSF non contempla a posibilidade de realizar prácticas profesionais nos países onde traballamos.

O proceso de selección non ten un tempo de duración determinado: adoita ser de entre tres e seis meses, dependendo da dispoñibilidade de vacantes nos países onde traballamos. e do perfil da persoa. Trátase dun proceso minucioso durante o cal buscamos o posto máis adecuado para cada persoa seleccionada, e proporcionámoslle información pertinente sobre a organización.

Levamos a cabo unha selección continua de persoas que viaxarán ós proxectos, aínda que a asignación do primeiro destino vén determinada polas necesidades opercionais. Unha vez que a persoa supere o proceso de selección, e se as circunstancias así o permiten, terá que pasar por un período de iniciación e formación de varios días antes de incorporarse a un proxecto.

MSF asignará o destino do primeiro proxecto. Debes ter presente que MSF busca compromiso coa axuda médica e humanitaria, independentemente do contexto no que esta se leve a cabo. Nesta liña, a flexibilidade e capacidade de adaptación son competencias esenciais para calquera perfil en MSF.

A organización, como empregadora responsable, fornece ó persoal internacional coa información necesaria para que cada persoa poida dar un consentimento informado á súa saída ó proxecto. É fundamental que, durante o proceso de selección, a persoa se informe correctamente sobre os contextos de actuación de MSF e as condicións de saída. Con todo, se no momento de asignarlle un proxecto, ten serias dúbidas sobre o destino ó que terá que desprazarse (alta percepción de inseguridade), debe comunicalo á organización para estudar posibles alternativas.

Raramente o persoal de MSF con status laboral internacional pode traballar no seu propio país. A definición de internacionalidade implica saír do propio país de orixe, no caso de MSF para desenvolver un labor de atención médica e humanitario no ámbito internacional.

As condicións de vida e de traballo con MSF son a miúdo incompatibles coa presenza de persoas que non participan nos proxectos. Raramente se da a presenza de familias nos proxectos e en todo caso depende sobre todo das condicións de seguridade nos mesmos. Cada caso é estudado por separado. Con todo, nunca unha persoa que sae por primeira vez con MSF poderá ir acompañada de familiares.

Exceptuando os postos de coordinación, o resto de persoal internacional de MSF non pode viaxar ós proxectos con parella, polo menos durante os seus primeiros 12 meses de traballo na organización. Unha vez concluído ese período, e no caso de parellas nas que ambas as dúas persoas estean traballando en MSF, poderán solicitar unha misión conxunta.

As condicións salariais non son a principal motivación das persoas que traballan en MSF, aínda que a organización entende que se deben cubrir uns mínimos. Neste sentido, contamos cunha escala salarial estruturada en tres únicas categorías de postos (xerais, coordinacións e coordinación de proxecto). Á súa vez, en cada unha destas categorías, establécense até 14 niveis salariais en función dos anos de experiencia. Durante o primeiro ano, todas as persoas contarán cun salario inicial axustado (de aproximadamente 1.300 € brutos ó mes); a partir deste período, computarase a experiencia profesional previa e debidamente certificada.

A asistencia humanitaria demanda profesionais con experiencia e un alto nivel de competencias técnicas e persoais. Neste sentido, MSF pode ofrecer oportunidades de crecemento ás persoas que estean dispostas a comprometerse coa organización. Por iso, apostamos polo desenvolvemento da carreira profesional a través dun sistema de promoción, formación técnica de ámbito internacional, axuda económica para acceder a formacións externas, posibilidade de contratos de longa duración e plans de apoio.

Contamos cunha política de formación dirixida ás persoas que colaboran de forma continuada e asumen un compromiso duradeiro con MSF. Ademais dos cursos nacionais e internacionais que organizamos, ofrecemos a posibilidade de acceder a axudas económicas para realizar outras formacións externas. A capacitación do equipo humano é unha das nosas prioridades.

É obrigatorio posuír un nivel alto de inglés e/ou francés, é desexable un nivel alto árabe e/ou portugués e valoramos positivamente o coñecemento de dous deles como mínimo. Ao ser unha organización internacional, os nosos equipos están integrados por persoas de orixes diversas que adoptan como idioma común de traballo o máis falado no país no que desenvolven o seu labor. Á vez, o coñecemento de varios idiomas é un importante valor engadido á hora de asignar un proxecto e para poder desenvolverte dentro da organización e en contextos diversos.

Non, pero debes ter en conta as condicións de vida e de traballo nos países nos que operamos. A maioría das persoas que traballan con MSF por primeira vez teñen entre 25 e 40 anos.