Marco de colaboración

As empresas son clave na nosa sociedade e constitúen parte do tecido social que apoia a Médicos Sen Fronteiras. Por esta razón, en MSF queremos crear un espazo de traballo común con empresas e entidades, que nos permita construír relacións a longo prazo baseadas na confianza e a transparencia.

MSF estableceu un marco que orienta a súa relación co sector empresarial, e cuxo único obxectivo é preservar os principios básicos da acción humanitaria; a misión da organización; a seguridade dos nosos equipos e das persoas ás que atendemos; e a propia imaxe de MSF.

MSF establecerá limitacións totais ou parciais de colaboración ou financiamento cos seguintes sectores:

• Armamentístico.
• Promoción e venda de tabaco.
• Extracción de recursos naturais.
• Xogo e apostas.
• Pornografía.
• Alcol.
• Luxo.

Ademais, MSF non establecerá acordos de financiamento con laboratorios farmacéuticos ou empresas de fabricación de material e equipamento médico, para evitar un conflito de intereses. Excepcionalmente, MSF aceptará doazóns en especie destas empresas cando estea xustificado desde o punto de vista médico.

Se a túa empresa pertence a un destes sectores e desexas colaborar connosco, por favor contáctanos para coñecer en detalle os condicionantes.

As empresas que colaboran con MSF deberán ser respectuosas con:

• Os dereitos humanos, así como a dignidade, diversidade e identidade das persoas coas que se relacione.
•  As convencións internacionais relativas á loita contra o racismo e a xenofobia.
• Os tratados internacionais relativos ó traballo forzoso, o traballo infantil e o dereito de sindicación.
• O medio ambiente e as normas internacionais que regulan a súa protección e conservación.
• A lexislación ordinaria vixente, tanto no país no que reside como no ámbito internacional alí onde desenvolva a súa actividade.

MSF resérvase en todo momento a potestade de rexeitar unha colaboración ou mesmo devolver unha doazón cando non se axuste a este código de relación con empresas e fundacións, ou cando así o crea oportuno.