A nosa Carta Magna

O noso labor humanitario basease nos principios e valores establecidos na Carta Magna: neutralidade, imparcialidade, non discriminación, compromiso persoal e ética médica. Estes valores vívense e póñense en práctica tódolos días nas accións e decisións que tomamos. Por iso, todas as persoas que traballamos nesta organización debemos adoptar estes valores como propios: calquera persoa que se una a MSF, debe aceptar e asinar a Carta Magna, que é parte integral do seu contrato.

CARTA MAGNA DE MÉDICOS SEN FRONTEIRAS

Médicos Sen Fronteiras é unha asociación privada con vocación internacional. A asociación reúne maioritariamente a persoal da medicina e do mundo sanitario e está aberta a outros profesionais útiles á súa misión. Todos se comprometen a honrar os seguintes principios:

Os Médicos Sen Fronteiras socorren ás poboacións desamparadas, ás sobreviventes de catástrofes de orixe natural ou humano, de situacións de conflito, sen ningunha discriminación por raza, relixión, filosofía ou política.

Ó actuar con neutralidade e imparcialidade, os Médicos Sen Fronteiras reivindican, en nome da ética médica universal e do dereito á asistencia humanitaria, a plena e enteira liberdade do exercicio da súa función.

Comprométense a respectar os principios deontolóxicos da súa profesión e a manter unha total independencia de todo poder, así como de toda forza política, económica ou relixiosa.

Na súa condición de voluntarios e voluntarias, miden os riscos e perigos das misións que cumpren e non reclamarán para si mesmos nin para os seus achegados compensación algunha, agás a que a asociación sexa capaz de proporcionarlles.