Como enviamos axuda?

Se somos capaces de responder as emerxencias nun máximo de 72 horas, á vez que mantemos os nosos proxectos regulares en máis de 70 países, é grazas á profesionalización da nosa loxística e cadea de abastecemento. 

É a gran descoñecida e, con todo, é a que garante que os nosos equipos sempre conten, alí onde vaian, cos materiais precisos para prestar atención médico-humanitaria de forma rápida, eficaz e adaptada.

Esta rede loxística comeza nos nosos centros internacionais de abastecemento de Bruxelas (Bélxica), Bordeos (Francia) e Ámsterdam (Países Baixos), que fornecen a toda a nosa organización. Alén disto, temos un almacén de artigos de primeira necesidade e material de refuxio en Dubai (Emiratos Árabes).

Estas centrais mercan, almacenan e xestionan os envíos ós proxectos regulares e ós equipos de emerxencias: medicamentos, material e equipamento médico, sanitario, loxístico, administrativo… Cando chegan ós almacéns, todas estas mercadorías pasan primeiro por un control de calidade. Debido ó volume de actividade das nosas operacións e á eficiencia da xestión do abastecemento, a rotación do material nas nosas centrais é moi elevada: en dúas ou tres semanas, case todo o material ten sido enviado e reposto.

O custo do transporte depende da urxencia e do volume e peso do cargamento: unha gran emerxencia nutricional pode requirir fretar un Boeing 747, que pode custar máis de 200.000 euros dependendo do destino final. En caso de gran emerxencia, cando hai moita demanda de cargamentos, os prezos dispáranse.

Antes do seu envío ós países onde traballamos, etiquetamos todo o material Unha vez no país de destino, rexistramos os materiais e almacenámolos até o seu uso. Nos proxectos tamén temos stocks de emerxencia que nos permiten reaccionar máis rapidamente se for preciso

Os kits, referencia mundial

Para levar a cabo as súas actividades médico-humanitarias, MSF utilizamos uns 5.000 artigos diferentes, polo que organizalos en kits resulta fundamental para axilizar os envíos. Montamos os kits a partir de listas estandarizadas: así garantimos que os nosos equipos reciben, inmediatamente e dunha soa vez, todo o material preciso para cada tipo de intervención. Fomos a primeira organización en desenvolvelos, nos anos 80, e hoxe son referencia no mundo humanitario.

Existen os kits de funcionamento interno (comunicacións, transporte, administración, electricidade e outros) e os de axuda (primeiros auxilios, cirurxía, hixiene, vacinación, refuxio, os especializados en patoloxías concretas como o cólera etc.)

Temos uns480 tipos diferentes de kits, de complexidade variábel: algúns son relativamente sinxelos, como o de primeiros auxilios, mentres que outros requiren un avión enteiro para o seu transporte, como o de cólera. Entre os máis utilizados con poboación desprazada, atópase o de hixiene: inclúe xabón de uso persoal e para roupa e vaixela, toallas, cepillo e pasta de dentes, cueiros, peite, espello e outros utensilios básicos para que unha familia recupere unha certa normalidade na súa vida diaria.

Os kits máis complexos divídense en módulos: o de cirurxía inclúe módulos de anestesia, sutura, apósitos e vendas, esterilización, mesas de operacións etc. O de ébola é un dos máis caros: contén medicamentos, equipo para mostras de sangue, material loxístico, de saneamento e illamento, traxes protectores…: unhas 80 caixas, cun custo de máis de 60.000 euros..

Ademais, existe unha extensa lista de kits loxísticos: o de comunicacións por radio leva receptores, transmisores, repetidores, antenas, adaptadores, cables, baterías, ferramentas básicas etc.