Saúde sexual e reprodutiva

Segundo a Organización Mundial da Saúde, preto de 800 mulleres morren cada día por complicacións relacionadas co embarazo e o parto. A meirande parte destas mulleres vivían de renda baixa e renda media baixa e non recibiron a atención que precisaban.

As principais causas de mortalidade materna, responsables de até case o 75% de tódalas mortes, son as hemorraxias posparto, as infeccións, a alta presión sanguínea e as complicacións derivadas de abortos non seguros.

En 2000 e dentro dos Obxectivos de Desenvolvemento do Milenio, a comunidade internacional comprometeuse a reducir a taxa de mortalidade materna* nun 75% para 2015 en relación con 1990. Mais, nos derradeiros 25 anos, a taxa só reduciu nun 44%. Na maioría de contextos onde traballamos, moitas mulleres seguen morrendo por causas que se poden previr e os problemas relacionados coa saúde reprodutiva son a principal causa de morte na idade fértil.

Ter acceso a servizos de saúde reprodutiva non só prevén mortes senón tamén discapacidades permanentes, por exemplo as fístulas obstétricas debidas a partos prolongados. Nos nosos proxectos demostramos que as intervencións con métodos sinxelos e económicos, levadas a cabo por persoal de saúde capacitado, poden salvar a vida de moitas mulleres.

Que é a saúde reprodutiva?

Segundo a Organización Mundial da Saúde (OMS), a saúde reprodutiva é o estado de completo benestar físico, mental e social, nos aspectos relativos á sexualidade e a reprodución en todas as etapas da vida. Implica que as persoas poidan ter unha vida sexual segura e satisfactoria, a capacidade de ter descendencia e a liberdade de decidir se os queren ter, cando e con que frecuencia. Tanto o home como a muller teñen dereito a estar informados e ter acceso a métodos de regulación da fertilidade seguros, eficaces e accesibles, así como a dispoñer de servizos accesibles de planificación familiar e saúde pública que permitan a axeitada asistencia profesional ás mulleres embarazadas e aseguren que o parto se produza de forma segura e garanta o nacemento de fillas sas e sen discapacidade algunha.

Adaptar os servizos ás necesidades

O obxectivo dos servizos de saúde sexual e reprodutiva é reducir a morbilidade e mortalidade materna mediante o aumento da dispoñibilidade de servizos de calidade e do acceso ós mesmos.

As mulleres, especialmente aquelas que viven en países de renda baixa e renda media baixa, sofren de forma desproporcionada complicacións durante o embarazo e o parto, embarazos non desexados, enfermidades de transmisión sexual (incluíndo VIH), violencia sexual e de xénero e outros problemas relacionados coa saúde reprodutiva. A carga que supón un estado de saúde feble é aínda maior entre certos grupos de mulleres como as refuxiadas, as migrantes e as traballadoras do sexo. Desta maneira, as estratexias para ofrecer servizos a estas poboacións deben estar adaptadas ás súas necesidades.

A aceptación e o acceso ós servizos melloran se son de balde, sensibles á cultura local e se se ofrecen xunto a mensaxes de promoción da saúde, involucrando á comunidade na toma de decisións. Así mesmo, é importante salientar a responsabilidade compartida cos homes e promocionar a súa participación na saúde sexual e reprodutiva, así como introducir servizos adaptados ás adolescentes xa que teñen necesidades médicas específicas neste ámbito.

Atención integral ás mulleres

Nos nosos programas de saúde sexual e reprodutiva incluímos varios compoñentes:

• Asistencia obstétrica e neonatal de urxencia (partos, cesáreas, transfusión sanguínea etc.) que inclúe: atención ás principais complicacións obstétricas relacionadas coa mortalidade materna, asistencia ás complicacións derivadas dun aborto non seguro e acceso a un aborto seguro.
• Servizos preventivos de atención prenatal, posnatal e planificación familiar.
• Asistencia a superviventes de violencia sexual. Nestes casos, administramos contraceptivos de urxencia, profilaxe antirretroviral para reducir o risco de transmisión do VIH/sida e antibióticos para previr outras infeccións de transmisión sexual. Tamén lles ofrecemos apoio psicosocial.
• Prevención datransmisión maternoinfantil da infección por VIH.
• Prevención e tratamento da fístula obstétrica.
• Atención ás consecuencias da mutilación xenital feminina.
• Detección e tratamento de enfermidades de transmisión sexual.

MSF e a saúde reprodutiva

Debido ó gran impacto dos coidados obstétricos na supervivencia de mulleres e bebés, os nosos equipos priorizan os servizos e actividades relacionados co coidado obstétrico de urxencia, que atalla as principais causas de mortalidade.

En 2022, nos nosos proxectos en todo o mundo atendemos 295.300 partos incluíndo cesáreas. Tamén atendemos a 39.900 superviventes de violencia sexual.

* A proporción de nais que non sobreviven ó parto en comparación coas que o fan.