-
© John Stanmeyer/VII Enfermidades esquecidas
Millóns de persoas enferman, sofren e a miúdo falecen todos os anos no mundo por mor de enfermidades que poden tratarse ou previrse mediante unha vacina. Nalgunhas destas enfermidades parece que a loita se deu por perdida hai décadas, mentres que noutros casos os esforzos realizados son insuficientes. O común denominador é que quen as padecen adoitan ser persoas sen recursos, e polo tanto non ofrecen un negocio atractivo para a industria farmacéutica e os institutos de investigación.
Enfermidades esquecidas como o kala azar, o Chagas ou a enfermidade do sono están fóra das axendas da investigación e o desenvolvemento porque non son rendibles. Outras veces, faise negocio á conta das e dos pacientes, como ocorre coa vacina contra a pneumonía, a enfermidade infecciosa máis mortífera na infancia.
En todos estes casos, o resultado é o mesmo: emerxencias desatendidas que provocan mortes que na súa maioría son evitables. Estas son algunhas das máis habituais nos nosos proxectos:
-
Chagas
O Chagas é unha infección parasitaria crónica que, sen tratamento, pode ser mortal. Estímase que 8 millóns de persoas a padecen; na súa inmensa maioría non foron diagnosticadas, nin por suposto tratadas.
-
Chikungunya
Chikungunya significa “o que se torce”, unha descrición moi fiel das persoas que padecen esta enfermidade, que adoitan camiñar encurvadas debido ás fortes dores de articulacións que provoca.
-
Desnutrición
Tres millóns de nenos e nenas morren cada ano de desnutrición ou causas relacionadas. Esta enfermidade, porén, ten un tratamento eficaz. Urxe a reforma das axudas alimentarias internacionais.
-
Enfermidade do sono
A redución de novos casos foi tanta que, se todas as persoas afectadas fosen tratadas e se controlase a mosca tse-tse, poderiamos estar a un paso de eliminar a enfermidade.
-
Kala azar
Grazas á nosa experiencia directa na atención do kala azar, contribuímos a mellorar os métodos de diagnose e os protocolos nacionais e internacionais de tratamento.
